तीन अस्पताललाई करोडौं मूल्य बराबरको स्वास्थ्य सामग्री सहयोग

जनकपुरधाम, माघ १८ गते । सिरहाका तीन अस्पतालले करोडौं मूल्य बराबरका स्वास्थ्य सामग्री तथा उपकरण प्राप्त गरेका छन्। ‘हेल्पिङ ह्याण्ड फर रिलिफ एन्ड डेभलपमेन्ट’ नामक गैरसरकारी संस्थाले धनगढीमाई नगरपालिका–९ स्थित नैनपुर अस्पताल, सुखीपुर नगरपालिका–८ स्थित आधारभूत अस्पताल, र अर्नमा गाउँपालिका–१ स्थित महनौर अस्पताललाई यी सामग्री हस्तान्तरण गरेको हो। बुधबार आयोजित विशेष कार्यक्रममा तीन वटै पालिकाका प्रमुख, जनप्रतिनिधि, समाजसेवी तथा स्वास्थ्यकर्मीहरूको उपस्थितिमा सामग्री प्रदान गरिएको थियो।

संस्थाका महासचिव मो मेराज खानका अनुसार यस सहयोगले विशेषगरी दलित, अति विपन्न तथा आर्थिक रूपमा कमजोर समुदायलाई प्रत्यक्ष लाभ पुर्याउने उद्देश्य राखेको छ। अमेरिकन सहयोगमा सञ्चालित यस परियोजना मधेश प्रदेशका सिरहा, महोत्तरी, सर्लाहीसहित देशभरका ४२ जिल्लामा शिक्षा, स्वास्थ्य, कृषि लगायतका क्षेत्रमा सामाजिक सेवामा संलग्न छ। सिरहाका अस्पतालहरूलाई प्रदान गरिएको स्वास्थ्य सामग्रीले स्थानीय स्वास्थ्य सेवाको पहुँच सुधार्न र सेवा प्रवाहलाई प्रभावकारी बनाउन महत्त्वपूर्ण भूमिका खेल्ने अस्पताल प्रशासनले जनाएको छ।