वीरगञ्जबाट पेट्रोलियम पदार्थ आयातमा वृद्धि, राजस्व संकलनमा ४ अर्बको वृद्धि

जनकपुरधाम, माघ १० गते । वीरगञ्ज भन्सार कार्यालयका अनुसार चालु आर्थिक वर्षको पहिलो छ महिनामा ८७ अर्ब ३२ करोड ३९ लाख रुपैयाँ बराबरका डिजेल, पेट्रोल, लिक्विफाइड पेट्रोलियम ग्यास (एलपीजी), एभिएशन टर्बाइन फ्युल (एटिएफ), र मट्टितेल आयात गरिएको छ। यसबाट ३६ अर्ब ९६ करोड ३६ लाख रुपैयाँ राजस्व संकलन भएको छ, जुन गत आर्थिक वर्षको सोही अवधिको तुलनामा करिब ४ अर्ब रुपैयाँले वृद्धि भएको हो।

चालु आवमा ४२ अर्ब २४ करोड रुपैयाँ बराबरको ४ लाख ७९ हजार ७९९ किलोलिटर डिजेल आयातबाट १८ अर्ब ९८ करोड रुपैयाँ राजस्व संकलन भएको छ। त्यस्तै, दुई लाख २० हजार ३८५ किलोलिटर पेट्रोल आयातबाट १२ अर्ब ४७ करोड रुपैयाँ राजस्व दाखिला भएको छ। एटिएफ आयाततर्फ ८९ हजार ३८० किलोलिटरबाट एक अर्ब एक करोड रुपैयाँ संकलन गरिएको छ भने ४ हजार २० किलोलिटर मट्टितेल आयातबाट १० करोड रुपैयाँ राजस्व सङ्कलन भएको छ। गत आवको सोही अवधिमा ८८ अर्ब ७८ करोड रुपैयाँ बराबरका पेट्रोलियम पदार्थ आयात हुँदा ३२ अर्ब ९५ करोड रुपैयाँ राजस्व संकलन भएको थियो।