सार्वजनिक ऋण २५ खर्ब रुपियाँ नाघ्यो

काठमाडौं, माघ ६ गते । चालू आर्थिक वर्षको पहिलो छ महिनामा सार्वजनिक ऋण २५ खर्ब ३६ अर्ब १३ करोड रुपियाँ पुगेको छ। यो अवधिमा १ खर्ब २ अर्ब ३ करोड रुपियाँ ऋण थपिएको सार्वजनिक ऋण व्यवस्थापन कार्यालयले जनाएको छ। कुल गार्हस्थ उत्पादन (जीडीपी) मा सार्वजनिक ऋणको हिस्सा ४४ दशमलव ४६ प्रतिशत रहेको छ। राष्ट्रिय तथ्यांक कार्यालयका अनुसार नेपालको जीडीपी ५७ खर्ब ५ अर्ब रुपियाँ अनुमान गरिएको छ। आर्थिक वर्षको सुरूवातमा सार्वजनिक ऋण २४ खर्ब ३४ अर्ब ९ करोड ९८ लाख रुपियाँ रहेको थियो।

सरकारले पहिलो छ महिनामा कुल २ खर्ब ४० अर्ब ८ करोड ७२ लाख रुपियाँ ऋण लिएको छ। तर, यसै अवधिमा १ खर्ब ८२ अर्ब ४० करोड १९ लाख रुपियाँ अर्थात् ४५ दशमलव २८ प्रतिशत ऋणको साँवा र ब्याज भुक्तानी गरिएको छ। चालू आर्थिक वर्षमा ५ खर्ब ४७ अर्ब रुपियाँ ऋण लिने लक्ष्य राखिएको छ, जसमा ३ खर्ब ३० अर्ब आन्तरिक र २ खर्ब १७ अर्ब बाह्य ऋण समावेश छ। हालसम्म लक्ष्यको ४३ दशमलव ८९ प्रतिशत ऋण प्राप्त भइसकेको छ।