मायोट द्वीपमा शताब्दीको शक्तिशाली चक्रवात: १०० भन्दा बढीको मृत्यु

एजेन्सी , पुस १ गते ।  हिन्द महासागरको मायोट द्वीपमा ‘चिडो’ नामको शक्तिशाली चक्रवातले ठूलो जनधनको क्षति गरेको छ। फ्रान्सको स्वामित्वमा रहेको यस द्वीपमा चक्रवातका कारण कम्तीमा एक सय जनाको ज्यान गएको पुष्टि भएको छ। मृत्युको संख्या अझै बढ्न सक्ने अनुमान गरिएको छ, जसले द्वीपवासीलाई थप त्रासको वातावरणमा पुर्‍याएको छ।

२२५ किलोमिटर प्रतिघण्टाको गतिमा आएको यो चक्रवातलाई एक सय वर्षयताकै सबैभन्दा शक्तिशाली मानिएको छ। चक्रवातले घर, संरचना र आधारभूत पूर्वाधारमा व्यापक क्षति पुर्‍याएको छ। उद्धार टोलीले प्रभावित क्षेत्रमा राहत र सहयोग पुर्‍याउन संघर्ष गरिरहेका छन्। विशेषज्ञहरूका अनुसार यस्तो विनाशकारी चक्रवातले जलवायु परिवर्तनका कारण समुद्री क्षेत्रहरूमा बढ्दो जोखिम देखाउँछ।