१४ वर्षमुनिका बालबालिकाको क्यान्सर उपचार अब सरकारी अस्पतालमा निःशुल्क

2 महीना पहिले प्रकाशित

काठमाडौं, कार्तिक १२ गते ।  स्वास्थ्य तथा जनसङ्ख्या मन्त्रालयले १४ वर्षमुनिका बालबालिकाको क्यान्सर रोगको उपचार सरकारी अस्पतालहरूमा निःशुल्क गराउने निर्णय गरेको छ। स्वास्थ्य मन्त्री प्रदीप पौडेलले गरेको मन्त्रीस्तरीय निर्णयअनुसार आउँदो मङ्सिर १ गतेदेखि कान्ति बाल अस्पताल काठमाडौं, भक्तपुर क्यान्सर अस्पताल र बीपी कोइराला मेमोरियल क्यान्सर अस्पताल चितवनमा यो सुविधा उपलब्ध हुनेछ। मन्त्री पौडेलले पदबहाली गरेपछि बालबालिकाको क्यान्सर उपचार निःशुल्क बनाउने योजना अघि बढाएका थिए।

स्वास्थ्य मन्त्रालयका प्रवक्ता डा. प्रकाश बुढाथोकीका अनुसार, उपचारका लागि आवश्यक रकममा अपुग भए मन्त्रालयको आन्तरिक स्रोतबाट व्यवस्थापन गरिनेछ। नेपालमा हरेक वर्ष करिब १५ सय बालबालिका क्यान्सर रोगी देखिने तथ्याङ्कले देखाएको छ, र सन् २०२२ मा मात्रै २२ हजार नयाँ क्यान्सर बिरामीमध्ये १४ हजारले ज्यान गुमाएका छन्। कुल मृत्युहरूमध्ये ७१ प्रतिशत नसर्ने रोगका कारण हुने गरेको छ, जसमा ११ प्रतिशत क्यान्सरको कारण रहेको मन्त्रालयको तथ्याङ्क छ।

यो खबर पढेर तपाईलाई कस्तो महसुस भयो ?

कमेन्ट गर्नुहोस्
view comments