बुद्ध एयरले बनारसका लागि तेस्रो साप्ताहिक उडान सुरु

काठमाडौं, असोज २ गते ।  बुद्ध एयरले आज (बुधबार) देखि भारतको बनारसका लागि तेस्रो साप्ताहिक उडान थपेको छ। यसअघि बुद्धले सोमबार र शुक्रबार मात्र उडान गर्दै आएको थियो, तर अब सातामा तीनपटक उडान हुने भएको छ। बुद्ध एयरका अनुसार यो थप उडानले यात्रुलाई भारत आवतजावतमा थप सहुलियत प्रदान गर्नेछ।

बुद्ध एयरको भगिनी संस्था, बुद्ध होलिडेजले बनारस, सारनाथ, अयोध्या लगायतका क्षेत्रको लागि विशेष होलिडेज प्याकेज पनि उपलब्ध गराएको छ, जसले यात्रुलाई धार्मिक र सांस्कृतिक गन्तव्य भ्रमणमा सुविधा प्रदान गर्नेछ।

यस उडानले सोह्रश्राद्ध गर्न जाने यात्रुलाई पनि सहज बनाउने कम्पनीले जनाएको छ। बुद्ध एयरको उडानमार्फत काठमाडौंबाट बनारस पुग्न ५० मिनेट मात्र लाग्छ। काठमाडौंबाट बनारसका लागि सुरूवाती एकतर्फी भाडा ११,३६० रूपैयाँ निर्धारण गरिएको छ। उडान समय काठमाडौंबाट बिहान ७:१५ बजे र बनारसबाट बिहान ८:३० बजे हुनेछ।