जनकपुरमा डाक्टरहरूको टोलीले आफ्नै रगत दिएर ३० वर्षीया महिलाको ज्यान बचाए

जनकपुरधाम, साउन ३२ गते । प्रादेशिक अस्पताल जनकपुरमा एक ३० वर्षीया महिलाको ज्यान बचाउन डाक्टरहरूको टोलीले आफ्नै रगत दिएको छ। धनुषा जिल्लाको सबैला नगरपालिका वडा नं. ७ मखनाहा निवासी हसिना खातुनलाई बच्चा मरेपछि गम्भीर रक्तश्राव भएको थियो। रगतको अभावमा डाक्टरहरूले आफ्नो रगत दिएर हसिनाको अप्रेशन सफलतापूर्वक सम्पन्न गरे। गत विहीबार साउन २४ गते, हसिना खातुनलाई जनकपुरको प्रादेशिक अस्पतालमा भर्ना गरिएको थियो। ६ महिनाको गर्भमा रहेको बच्चा मरेपछि उनको स्वास्थ्य अवस्था जटिल भएको थियो।

बच्चालाई औषधिको माध्यमबाट निकाल्ने प्रयास गर्दा रक्तश्राव रोक्न ५ पोका रगत चढाइएको थियो, तर रक्तश्राव नरोकेपछि पाठेघर निकाल्न अप्रेशन गर्नुपर्ने स्थिति आयो। अप्रेशनका बेला नेपाल रेडक्रस सोसाइटीमा रगतको अभाव भएपछि, डा. राजदेव महतो नेतृत्वको चिकित्सक टोलीले आफ्नै रगत दिएर अप्रेशन सम्पन्न गर्‍यो। तुरुन्तै रगत दिएर डाक्टरहरूले हसिनाको ज्यान जोगाउन सफल भए। मुख्य सर्जन डा. राजदेव महतोको टोलीमा डा. चन्द्र रेखा इसार, डा. पिंकी साह, र अन्य डाक्टरहरूको सहयोग थियो।