देशका सबै प्रदेशमा सेवा विस्तार गर्दै बीपी कोइराला मेमोरियल क्यान्सर अस्पताल

चितवन,साउन २७ गते । चितवनस्थित बीपी कोइराला मेमोरियल क्यान्सर अस्पतालले देशका सबै प्रदेशमा सेवा विस्तार गर्ने योजना बनाएको छ। अस्पतालले आगामी भदौदेखि सबै प्रदेशमा सेवा विस्तार गर्न लागेको हो। अस्पतालका कार्यकारी निर्देशक डा. शिवजी पौडेलले संघीय सरकारको कार्यक्रम अन्तर्गत केन्द्रीय क्यान्सर अस्पतालले प्रदेशस्तरमा सेवा विस्तार गर्न लागेको जानकारी दिए।

उनका अनुसार, हरेक प्रदेशको एउटा सरकारी अस्पतालमा कम्तिमा पाँच शय्याको क्यान्सर उपचारकक्ष सञ्चालन गर्ने गरी सेवा विस्तार गरिनेछ। क्यान्सर परीक्षण गर्न अस्पतालको सेवा विस्तारको आवश्यकता भएको हो। कोशी प्रदेशको धनकुटा, मधेसको जनकपुर, गण्डकीको दमौली, लुम्बिनीको दाङ, कर्णालीको सुर्खेत र सुदूरपश्चिम प्रदेशको धनगढीमा सेवा विस्तार गरिनेछ। डा. पौडेलका अनुसार, हरेक महिना एक साता अस्पतालका विशेषज्ञ चिकित्सकहरूको टोली विस्तारित केन्द्रमा खटिनेछन्। सबै प्रदेशका स्वास्थ्य संस्थासँग समन्वय गरेर सेवा सञ्चालन गरिनेछ।